Teicneòlas labhairt‑gu‑teacsa Gàidhlig

Tuilleadh mu theicneòlas labhairt-gu-teacsa na Gàidhlig

Anns a' Chèitean 2026, chuir ÈIST air bhog aplacaid-lìn an-asgaidh a thionndaidheas Gàidhlig labhairte gu teacsa sgrìobhte. Tha i ann airson duine sam bith a bhios ag obair le claisneachd no bhidio sa Ghàidhlig: craoladairean, tidsearan, luchd-rannsachaidh, luchd-podcast no teaghlaichean aig a bheil seann chlàraidhean.

Mar a tha i ag obair

Luchdaich suas faidhle bhidio no claisneachd agus nì an aplacaid an còrr. Bidh am modail aithneachadh labhairt againn ag èisteachd ris a' chlàradh agus a' sgrìobhadh sìos na chluinneas e sa Ghàidhlig. Nochdaidh an teacsa mar fho-thiotalan a ruitheas leis a' bhidio. Faodaidh tu mearachdan a cheartachadh san aplaciad agus sùil a thoirt air an toradh mus cleachd thu e. Tha bhidio trèanaidh goirid sa Ghàidhlig a' taisbeanadh a' phròiseis. Chaidh na fo-thiotalan agus an t-eadar-theangachadh aige a dhèanamh leis an aplacaid fhèin.

Air chùl na h-aplacaid, tha tionndadh de mhodail fhosgailte Whisper aig OpenAI, a tha sinn air a thrèanadh air ceudan de dh'uairean de chainnt Ghàidhlig a chaidh a thar-sgrìobhadh. Mus tòisich an tar-sgrìobhadh, bidh an aplacaid a' sguabadh a-mach sàmhchair is fuaimean gus nach tèid ach cainnt a phròiseasadh. Tha an aplacaid agus gach pròiseasadh dàta air an cumail san Roinn Eòrpa.

Nota: mura deach an aplacaid a chleachdadh o chionn greis, dh'fhaodadh gun toir i mionaid no dhà mus tòisich i.

Dè cho pongail 's a tha i?

Le cainnt chraolaidh shoilleir, a leithid naidheachdan agus prògraman còmhraidh, bidh an siostam a' faighinn mu 90% de na faclan ceart. 'S e toradh làidir a tha sin do chànan aig nach eil ach glè bheag de dhàta trèanaidh. Tha a' phongalachd nas ìsle le stuth nas dùbhlanaiche:

• Clàraidhean tasglainn: tha mu 82% de na faclan ceart airson seann chlàraidhean bho Thasglann Sgoil Eòlais na h-Alba.
• Cainnt chloinne: tha na ciad toraidhean mu 71%, oir tha Gàidhlig na cloinne gu math eadar-dhealaichte bho chainnt inbheach. Tha sinn ag obair gu dian air an raon seo.
• Claisneachd fòin de dhroch chàileachd: tha na toraidhean an urra ri càileachd a' chlàraidh.

Tha sinn a' cruinneachadh barrachd dàta trèanaidh anns gach aon de na raointean seo, agus bidh na modailean a' leasachadh mar a dh'fhàsas an dàta. Thoir sùil air an toradh an-còmhnaidh mus foillsich thu e.

Carson a tha e cudromach

Tha a bhith a' tar-sgrìobhadh na Gàidhlig le làimh slaodach agus daor, agus mar sin tha mòran bhidiothan Gàidhlig ann gun fho-thiotalan idir. Tha tar-sgrìobhadh fèin-obrachail a' lùghdachadh na h-obrach sin gu mòr:

• Luchd-obrach a' BhBC: tha cuid aca a' cleachdadh an inneil gu làitheil, gu h-àraidh airson fo-thiotalan a chur ri bhidiothan goirid air-loidhne.
• Companaidhean riochdachaidh, luchd-podcast agus luchd-cruthachaidh susbaint: tha iad ag aithris gu bheil iad a' sàbhaladh tòrr ùine. Tha cuid aca ga chleachdadh airson prògraman telebhisein Gàidhlig coimiseanaichte a riochdachadh.

A bheil seo a' cur luchd-tar-sgrìobhaidh proifeiseanta à obair? Is e glè bheag de dhaoine a bhios a' tar-sgrìobhadh na Gàidhlig gu proifeiseanta, agus tha fada a bharrachd clàraidhean is bhideothan Gàidhlig ann na b' urrainn dhaibh làimhseachadh gu bràth, ann an tasglannan craolaidh, tasglannan fuaime agus riochdachaidhean ùra le chèile. Chan eil an t-inneal a' gabhail àite ar n-eòlais idir, oir feumaidh fileantach sùil a thoirt air na chuireas e a-mach fhathast. An àite sin, bidh e a' gabhail os làimh a' phàirt as slaodaiche dhen obair, gus an urrainn do thar-sgrìobhadairean sgileil barrachd stuth a làimhseachadh.

Tha fo-thiotalan cuideachd a' fosgladh susbaint Ghàidhlig do dhaoine a tha bodhar, agus do luchd-ionnsachaidh. Gabhaidh teacsa tar-sgrìobhte a rannsachadh, agus mar sin tha e nas fhasa clàraidhean a lorg agus a sgrùdadh. Tha an aon teicneòlas a' cuideachadh shaor-thoileach air Fosgladh an Tobair / Opening the Well gus clàraidhean traidiseanta a thar-sgrìobhadh do Thobar an Dualchais, agus bidh na tar-sgrìobhaidhean aca a' cuideachadh gus modailean nas fheàrr a thrèanadh.

'S e teicneòlas a tha seo a chaidh a thogail còmhla ri coimhearsnachd na Gàidhlig agus air a son.

Tha ÈIST air a mhaoineachadh aig Riaghaltas na h-Alba agus Bòrd na Gàidhlig.